LAOAG CITY – Kinumpirmaran ni Brgy. Chairman Jaime Maximo iti Brgy. Tabtabagan iti ili ti Banna a nagpositibo iti COVID-19 dagiti amin a pito a miembro ti pamilya iti maysa a pagtaengan pakairamanan dagiti dua nga ubbing nga agpada nga agtawen laeng ti maysa.
Segun kenni Maximo, daytoy ket kalpasan a naakaran dagitoy ni IN-C1337, maysa a babai, agtawen ti 53, residente iti Brgy. Medina iti ili ti Dingras ken maibilang kas Locally Stranded Individual a naggapu idiay Bulacan.
Inbatad na nga agkabagian da IN-C1337 ken ti sibubukel a pamilya a nagpositibo iti COVID-19 no sadinno ket adda ti aldaw a napan nagpasiar daytoy kadagiti maseknan.
Inlawlawag na a saan pay a dimmalan ti swab test ni IN-C1337 idi bimmisita daytoy iti Barangay da.
Kunana a naammoan laeng ni IN-C1337 a nagpositibo daytoy iti COVID-19 kalpasan a napan nagpa-check up iti Municipal Health Office gapu ta saan a nasayaat ti marikriknana rason a dimmalan daytoy iti swab test ket dita a positibo ti rimuar a resulta na.
Inbaga na a napan metten innalan ti MHO dagiti pito a miembro ti pamilya tapno maikabil dagitoy iti Quarantine Facility iti ili ti Banna.
Innayon ti Kapitan a gapu iti daytoy ket naipatungpal ti lockdown iti maysa a ligason ti Barangay da no sadinno umabot ti sangapulo a pamilya ti naapektaran.
