LAOAG CITY – Agpapan ita ket saan pay a napukawan ti namnama ni Charlene Tambago Caballes iti Marikina City a mabirukan na ti ama na a ni Charlemagne Tambago, ti kapitan ti barko a naarinebneb iti Calayan Island idi Disyembre 19. 2019.
Mamati ni Caballes a sibibiag pay laeng ti ama ken posible nga adda ti nakaalaw kenkuana.
Gapu iti daytoy, inpasingked na nga itultuloy na a biruken ti ama na isut gapo nga immay ditoy Northern Luzon.
Kunana a napan pay isunan iti Tuguegarao, Aparri, Sta. Ana, Claveria, Pagudpud, Currimao, Vigan, La Union, ken Pangasinan tapno mapan na biroken ti amana.
Immapela ni Caballes no siasino iti nakakitkita ti ama na ket ipakammo da laeng kenkuana.
Malaksid iti daytoy, nakikoordinar payen ni Caballes iti Philippine Coast Guard Northeastern and Northwestern Luzon, Philippine Navy ken Aerial Search Team.
Maipalagip a naarinebneb ti nagluganan a barko dagiti 5 crew karaman ni Tambago kalpasan nga inyanod daytoy iti dadakkel a dalluyon.
Kadwa ni Tambago dagiti 4 pay a Filipino crew a da Rene Fernandez, Ryan Parungaw y Jose, Raymund Cotiangco y Delos Reyes ken Arnold Espanola nga inalaw ti Coastguard a nakabase iti Brgy. Victoria ili ti Currimao.
Maipalagip pay a nagpabati ni Tambago iti barko kalpasan a nagibato daytoy ti abandon ship call sakbay a naglagto dagiti 4 a crew manipod iti nagluganan da apaman a maarinebneb ti barko da.
