LAOAG CITY – Nagun-od ti maysa nga anak ti mannalon ken agtagibalay ti Rank 3 iti kaliplippas nga April 2025 Electronics Technicians Licensure Examination.
Segun ken ni Ms. Althea Joy Tabula, saanna a ninamnama a makapasa daytoy nangnangruna iti panagbalinna kas maysa kadagiti topnotchers a nakagun-od ti 93.00% rating.
Inbatadna a ti kangrunaan a pannubok a sinangona kabayatan ti panagrebyuna ket ti pressure ken ti panagdudua ti bagina no makapasa isuna wenno saan.
Inlawlawagna a daytoy ti umuna a daras a nangala isuna ti board examination nga ibilangna a nakarigrigat.
Kunana nga adda ti kabsat ti pagayamna nga Electronics Engineer a nagbalin nga inspirasionna tapno mangala ti kurso a Bachelor of Science in Electronics Engineering.
Mainaig iti daytoy, kagadupan iti 31 a nangala ti nasao nga eksaminasion manipud iti Mariano Marcos State University, 29 ditoy ti nakapasa a nakagun-od ti 93.55% a nangatngato ngem iti passing rate nga 81.75% a national average.
Kabayatanna, ni Althea Joy ket maysa kadagiti 1,971 a baro nga Electronics Technicians iti intero a pagilian.
