LAOAG CITY – Naaprobaran iti maikadua ken maudi a pannakaibasana ti Draft Provincial Resolution No. 2024-04-295 a maysa a resolusion a mangaprobar iti Provincial Development Council Resolution No 2024-01 a mangadaptar iti Amended Provincial Development Investment Program 2023-2028 (Year Covered: 2025) ken Fiscal Year 2025 Annual Investment Program ti gobierno probinsial.
Daytoy ket indasar ni Sangguniang Panlalawigan Member Ryan John Pascua ti Chairman iti Committee on Barangay Affairs kabayatan ti pannakaiyuswat ti regular session ti hunta probinsial.
Inbatadna a daytoy ket tapno matulungan ti probinsia a mangiturong ti direksion ti panagdur-as ti ekonomia ken panangkoordinar kadagiti panagregget ti panagdur-as ditoy probinsia.
Inlawlawagna a ti nasao a resolusion ket dakkel a makatulong kadagiti banag a kasapulan nga ipangpangruna tapno agtultuloy a maragpat ken maisayangkat dagiti proyekto ken programa.
Kunana a gagem ti gobierno probinsial nga ad-adda pay a padur-asen iti benneg ti agrikultura, turismo, salun-at, Micro Small and Medium Enterprises, Investment Job Creation Environment, Education and Transportation ken Social Protection.
Innayonna a dagiti programa ken aktibidad ket mangpabaliw iti probinsia iti natalna ken nasayaat a pannakabangon ken progresibo a mangidaulo iti komunidad.
Kabayatanna, naammoan a dakkel a tulong daytoy tapno maalay-ayan ti economic developmemt ditoy probinsia.
