LAOAG CITY – Naarestar ti maysa a mannalon babaen ti naisayangkat nga anti-illegal drug buy bust operation nga inyuswat dagiti otoridad iti Barangay Caray iti ili ti Nueva Era.
Nabigbig ti suspek a ni Jayson Castillo, agtawen ti 30, addaan ti live-in partner, mannalon, dati a drug surrenderee ken residente iti Barangay Imelda iti ili ti Banna.
Nakumpiskar manipud kenkuana ti maysa a gramo ti maipagarup a shabu nga agbalor ti 6,800 a pisos, ken sabali pay a plastic sachet ti maipagarup a shabu, dua a pedaso ti one thousand peso bill, motorsiklo ken sigarilyo.
Basar iti pannakiuman ti Bombo Radyo Laoag iti suspek, inlawlawagna a mannarimaan daytoy nga apaspasyar iti spillway a sakupen ti Barangay Caray iti ili ti Nueva Era idi kellaat nga inarestar isuna dagiti lima a lallaki a nakasibilyan.
Segun ken ni Castillo, inpabulsada laeng dagiti nakumpiskar kenkuana nga illegal a droga.
Masdaaw pay daytoy gapu ta dua a one thousand peso bill ti naala kenkuana iti laksid a sangaribu laeng ti kwarta na apaman a naiwat ti operasyon.
Ngem nu pay kasta, inadmitirna a dati nga agus-usar isuna iti illegal a droga.
Mainaig iti daytoy, inpetteng met ni P/Cpt. William Sotelo, hepe ti Philippine Nationa Police iti ili ti Nueva Era a ni Castillo ket agilaklako ti illegal a droga ken nabayagen nga imonmonitorda.
Kunana nga adda pay kadwa ti suspek ken adu dagiti laklakwan na iti ili ti Nueva Era.
Kabayatanna, inpasigurado ni Sotelo nga itultuloyda nga imonitor dagiti maipagarup a laklakwan ni Castillo iti ili da.
