LAOAG CITY – Manamnama ti panaglukat ti aplikasion para iti Review and Examination Assistance Program ti Ilocos Norte Youth Development Office.
Segun ken ni Mr. Willie Jake Sib-at, ti mangidadaulo iti nasao a pangopisinaan, ti Review and Examination Assistance Program ket kalikagumna a matulungan dagiti residente ditoy probinsia nga agrebyu para iti Civil Service Commission examination a libre.
Inbatadna a daytoy ket nabukel kabayatan ti panagtataripnong dagiti agtutubo ken education sector pakairamanan ni Gov. Matthew Marcos Manotoc.
Inlawlawagna a ditoy a naipakaammo ken ni Gov. Manotoc a malaksid iti tuition fee a gasgastoen dagiti estudiante kabayatan ti panagadalda ket aggasgastoda pay kabayatan ti licensure examinations pakairamanan ti Civil Service Examination.
Kunana nga iti nasao a programa ket manamnama a mangrugi inton malpas ti panagaplikar iti Civil Service Examination para iti bulan ti Agosto.
Mainaig iti daytoy, kuna ni Mr. Sib-at a first come first serve basis daytoy no sadino adda ti 50 nga indibidual ti maakomodar iti umuna a bansada ti Review and Examination Assistance Program.
Naammoan a dagiti aplikante ket kasapulan a residente ditoy probinsia nga agtawen ti 18 agingga 30, manipod iti pamilia a low income bracket ken kasapulanda nga agipasa ti Application Letter ken ni Gov. Manotoc.
Malaksid iti daytoy, masapol pay nga agipasada ti original copy ti Barangay Clearance, Certificate of Indigency, photocopy ti valid ID, photocopy ti application receipt stub manipod iti Civil Service Commission ken application form ti Ilocos Norte Youth Development Office.
Innayonna a dagiti mapili ket makaala ti 500 pesos subsidy ken adda ti maidasar a meal ken snack kabayatan ti pannakaiyuswat ti panagrebyu.
