LAOAG CITY – Inpakaammo ni Ms. Marilyn Vergara, Chief Statistician iti PSA ditoy probinsya a mangrugi intono Marso 1 ket maipatungpalen ti online transaction para iti panangala kadagiti dokumento.
Segun kenni Vergara, idi kuma pay laeng Enero 24 a naan-anay a maipatungpal ti appointment system kas direktiba manipud iti Central Office.
Nupay kasta, kunana nga iti naglabas ket bassit laeng dagiti makammo pay iti daytoy a sistema isut gapo na nga inawat da latta dagiti walk-in.
Inlawlawag na a ti appointment system ket inisyatibo ti National office ken ti maysa kadagiti rason ket tapno makita no siasinno dagiti agap-aplikar.
Inpetteng na a no ti maysa a tao ket nag-online appointment ket saanen a mabalin nga agpa-appoint iti sumaruno nga aldaw gapo ta saan nga awanen ti system no diket masapol nga iti sumaruno manen a lawas.
Gapo iti daytoy, ma-minimize ti bilang ti aplikasyon ken bilang dagiti dokumento a maaplikaran.
Inpalagip na pay a masapol a ti nagpa-appoint nga indibidual ket isu met laeng ti mapan mangala iti dokumento iti laksid nga adda ti authorization.
Inbatad na nga iti laksid daytoy ket iti met laeng opisina ti PSA ti pagbayadan dagitoy gapo ta ad-adalen pay laeng ti ahensya no ipatungpal na ti electronic payment.
Dinakamat na pay a dagiti residente iti sumagmamano nga ili ket mabalin nga agaplikar iti municipyo da ken ti Local Civil Registrar ti mapan ag-file iti opisina da ditoy ciudad ti Laoag.
Mainaig iti daytoy, kuna ni Vergara nga adda latta ti posibilidad na a bassit pay laeng dagiti mangsurot iti appointment system ngem agtultuloy met ti panangipakammo da iti daytoy.
Inpasigurado met ni Vergara nga iti laskid a mapapintas ti sistema ket saan a manayunan ti pagbayad iti kada transaksyon.
