LAOAG CITY – Inbatad ni Mr. Danver Dela Cruz, Presidente ti San Marcelino Irrigators Association nga adda ti sumagmamano a mannalon a limitarandan ti kalawa ti talonenda gapu iti agtultuloy a panagngato ti presio dagiti produkto a petrolyo.
Inlawlawag ni dela Cruz nga idi kinataripnong na dagiti pada na a mannalon ket adda dagiti nangidanun a saan dan a kayat pay ti agtalon gapu iti kinangina ti magastos ken dagiti mausar a pagtalon.
Nupay kasta, ginutigot na dagiti pada na a mannalon nga itultuloy da latta ti agtalon uray saanen a kas ti kalawa ti sigud a taltalonen da gapu ta no maminpinsan nga agsardeng da ket awan ti kanen ti pamilya da ken awan payen ti mailako para kadagiti umili.
Kunana a napinpintas no daytoy ti pakisugalan da ken mangnamnama da a ngumato ti presyo dagiti produkto da gapu iti mapaspasaran a krisis.
Namnamaen da pay ti naan-anay a suporta ti Department of Agriculture, aglalo ita a panawen a kangina dagiti magatgatang.
Innayon ni del Cruz a napintas koma no maisubli ti pannakaipalubos iti National Food Authority nga aglako ti bagas iti merkado publiko.
Kabayatanna, inpakaammo ni dela Cruz a napintas dagiti bin-i a naibunong kadakuada gapu ta maibagay iti panawen.
