LAOAG CITY – Arigna nagbalinen a “ghost town” ti Lahaina Maui, Hawaii gapu iti mapaspasamak a nalawa a wildfires.
Daytoy ket basar ken ni Bombo International News Correspondent Claudine Daguro iti Lahaina Maui, Hawaii.
Inyistorya ni Daguro a namindua da a nagbakwit no sadinno nga idi bassit paylaeng ti wildfires ket napanda iti maysa nga hotel.
Nupay kasta, naipakaammo kadakuada nga umas-asideg kadagiti dadakkel nga hotels ti wildfires isut gapuna nga inkarigatan da ti nagbiyahe a napan iti sentro ti Maui.
Segun ken ni Daguro, amin nga highways ken nakaserra gapu iti mapaspasamak a wildfires isut gapuna nga inkarigatan da ti nagna iti kabanbantayan uray delikado ken nalikos.
Kuna na a nagpaot iti agarop dua nga oras a nagbiyahe da sakbay a nakadanun da iti sentro no sadinno a naturog da iti parking lot ti maysa a fast food chain iti nadakamat a lugar.
Mainaig iti daytoy, kuna ni Daguro nga iti agdama ket saan da nga ammo no ania ti sumaruno nga addang da gapu iti nagbanagan ti Lahaina Maui nga isu ti pagnanaedan da.
Innayon na a ti napateg kadakuada iti agdama ket natalged da a sangapamilya.
Iti agdama, ti pamilya ni Daguro ket napanda paylaeng nakipagnaed iti balay ti bayawna.
Immun-una iti daytoy, kinumpirmaran ti Maui County nga umaboten iti 36 a tattao ti natay idinto a dinosdosena dagiti nasugatan a kaadoan ket kritikal ti kondisyon da iti mapaspasamak a wildfires iti lugar.
