LAOAG CITY – Inpetteng ni ABC President Mikee Fariñas ken mangidadaulo ti Committee on Transportation ditoy siudad ti Laoag a saan nga umanamong iti arkila system.
Inbatad na a masapol a masurot ti fare guide wenno manipod iti regular a plete agingga iti mainayun iti sumarsaruno a kilometro.
Mainaig iti daytoy, ginutigot ti Fariñas ti riding public a nu adda dagiti nalabes ti panagsingir na a tricycle drivers ket saan nga agamak nga agreport iti PNP-Traffic Division tapno maikkan ti pagmenna-menaan dagitoy.
Nagpalagip ni Fariñas kadagiti tricycle drivers a saan a gandaten ti over charging kadagiti pasahero gapu ta mabalin a daytoy ti mangitunda iti pannakarebokar iti prangkisa ti tricycle.
Kabayatanna, inadmitir ti ABC president a manarimaan pay laeng ti lamination ti treasury office ditoy siudad iti baro a fare guide ditoy siudad rason a saan pay a naited ti hard copy kadagiti tricycle drivers.
Maipalagip a basar iti baro a fare guide ket 15 a pisos ti regular a plete wenno umuna a kilometro, 12 a pisos kadagiti senior citizens ken estudyante idinto a tallo a pisos ti mainayun iti sumaruno a kilometro.
