LAOAG CITY – Dinutokan ni President Andry Rajoelina ti army general kas baro a Prime Minister idiay Madagascar tapno malpasen ti tignay protesta ti Gen Z kontra iti panangidaulona.
Inbatadna a kasapulan ti pagilianda ti natured ken addaan ti kabaelan tapno maisubli ti panangsurot iti pagannurotan ken ti talek dagiti tattao kas ken ni Gen. Ruphin Fortunat Zafisambo.
Daytoy ket kalpasan ti panagamak ti Presidente ti gandat a kudeta.
Ti nasao a tignay protesta ket naawagan kas Gen Z Mada a mangipakita a saanda nga umannugot iti pannakadutok ni Gen Zafisambo ken nagpanawaganda ti panag-resign ni Rajoelina iti uneg ti dua nga aldaw.
Iti napalabas a lawas, dinismiss ni Rajoelina ni Prime Minister Christian Ntsay, maysa a sibilian pakairamanan ti sibubukel a gabinetena iti gandat a paulimikenda dagiti agiwaywayat ti tignay protesta.
Ni Gen. Zafisambo ket director ti military cabinet iti prime minister’s office sakbay a nadutokan iti nasao a puesto.
Inrakurak ti United Nations nga adda ti 22 nga indibidual ti natay ken sumurok 100 ti nasugatan iti naiwayat a tignay protesta.
Naammoan a ginasut nga agtutubo a kaaduan kadagitoy ket university students ti nakipagpaset manipud iti Antananarivo agingga iti city centre.
Mainaig iti daytoy, one-third laeng iti 30 a milyon a tattao idiay Madagascar ti addaan ti kuryente basar iti International Monetary Fund (IMF).
Maipalagip a nangrugi ti tignay protesta idi Setiembre 25 kalpasan a nakapungtot dagiti tattao iti kanayon a panagpukaw ti serbisio ti danum ken kuryente gapu iti korapsion, nangato a bilang ti unemployment ken ti krisis iti panagbiag.
