LAOAG CITY – Ibilang ti Mariano Marcos Memorial Hospital and Medical Center iti siudad ti Batac a normal laeng ti atiddog a pila dagiti pasiente a mapan agpakonsultar.
Nupay kasta, inlawlawag ni Dr. Danilo Sanchez Jr., Chairman ti Occupational Safety and Health iti nasao nga ospital, posible a mangitunda ti risgo iti salun-at dagiti pasiente a mapan agpakonsultar iti ospital ti nabayag a panagur-uray gapu iti atiddog a pila.
Inbatadna a ti Mariano Marcos Memorial Hospital and Medical Center ket maibilang kas maysa a melting pot gapu ta nupay adda dagiti district hospital a masarakan kadagiti nagdumaduma nga ili ket ti nadakamat nga ospital ti mangsarsarapa kadagiti kaso a saanda a kabaelan a tamingen.
Kunana a ti Mariano Marcos Memorial Hospital and Medical Center ket maibilang pay kas DOH Hospital of the North a rason no apay a saan laeng a dagiti residente ditoy Ilocos Norte ti agturong ti nasao a balay-pagagasan no di ket pakairamanan pay dagiti pasiente manipud kadagiti kabangibang a probinsia kas ti Abra, Ilocos Sur, Cagayan ken Isabela.
Mainaig iti daytoy, kuna ni Dr. Sanchez nga ar-aramidenda amin a kabaelanda tapno malimitaran iti kinaatiddog ti pila.
Naammoan a manipud iti orihinal nga iskedyul ti Out Patient Department a Lunes agingga iti Biernes ket naiyalud-od daytoy agingga iti Sabado.
Gapu iti daytoy, nangiyuswatda ti sistema no sadinno nga adda ti appointment system wenno panangiyeskedyul ti aldaw ti check up dagiti pasiente tapno saanda nga aggegeddan.
Innayonna nga awan ti naikeddeng a cut off wenno awan ti lunch break dagiti doktor tapno maakomodar amin dagiti pasiente ken maipadanon ti alisto a serbisio medikal.
