LAOAG CITY – Personal a nagturong iti Department of Justice (DOJ) ti negosiante ken gaming tycoon a ni Charlie “Atong” Ang tapno isubmitir ti kontra salaysay daytoy mainaig iti kaso dagiti mapukpukaw a mammallot.
Segun iti abugado ni Ang a ni Atty. Gabriel Villareal, insapsapada ti agisubmitir ti counter affidavit tapno maliklikan ti riribuk nangruna ket adda ti 60 a respondents.
Dumanon iti 18 a pulgada ti kapuskol ti counter affidavit nga insubmitir ti kampo ni Ang pakairamanan ti maysa nga USB.
Inbatad ni Villareal, nakailanad kadagiti dokumento dagiti amin nga ammo ni Ang iti insidente pakairamanan ti pudno a pakabigbigan ni Julie Patidongan wenno Alyas Totoy.
Insubmitirda pay ti video a nakita ni Alyas Totoy a karaman ken iggemna ti maysa kadagiti mapukpukaw a mammallot.
Inlawlawagna a daytoy ti kadagsenan nga ebidensia kontra ken ni Patidongan nangruna ket inprisentar metten daytoy ti Philippine National Police – Criminal Investigation and Detection Group (PNP-CIDG) iti Department of Justice.
Saan met a nagbayag ni Ang iti Department of Justice ken saanen a nagpa-interview kadagiti kameng ti media.
