LAOAG CITY – Inpakaammo ni Atty. Donato Balderas Jr., ti Schools Division Superintendent iti Department of Education ditoy Ilocos Norte nga adda ti augmentation ti Philippine National Police personnel manipod idiay probinsia ti Ilocos Sur ken La Union para iti pannakaisayangkat ti Region 1 Athletic Association.
Segun kenkuana, daytoy ket tapno maipasigurado ti kinatalged dagiti amin a delegates manipod kadagiti nagduduma nga Schools Division iti intero a rehion uno.
Inbatadna a malaksid kadakuada ket adda pay dagiti kameng ti Marines, Philippine Coast Guard pakairamanan dagiti reservist ti Philippine Army, Mobile Groups kasta pay dagiti barangay tanod.
Inlawlawagna a 100 laeng ti bilang dagiti delegates iti kada Schools Division a nakiparada no sadino dagiti dadduma a participants ket nagdiretso dagitoy iti Ferdinand Edralin Marcos Stadium.
Kunana a nai-adjust ti oras ti panagparada dagiti delegates gapu pay laeng iti epekto ti kinabara ti panawen.
Innayonna a nagbalin met a napintas ti panangsarabo kadagiti amin a participants iti naindaklan nga aktibidad ditoy probinsia.
