LAOAG CITY – Inbatad ni Mr. Allan Alipio, taga Barangay Baay iti ciudad ti Batac ngem agdama a mangisursuro ken agnanaed idiay Australia a saanda sel-selebraran ti Teachers’ day iti nasao a pagilyan.
Kuna na a ti laeng kangrunaan a mangselselebrar iti daytoy ket ditoy Pilipinas.
Inlawlawag na a kadagitoy a gundaway ket semester break idiay Australia isut gapuna a nakabakasyon dagiti agad-adal.
Mainaig iti daytoy inbatad ni Alipio a selselebraran met ti China ti teachers day ngem saan a kas iti panangselebrar tayo ditoy Pilipinas.
Kabayatanna, inpanakkel na ti kaalisto ti gobierno ti Australia a mangipaay ti kasapulan dagiti amin a pagadalan iti nasao a pagilyan.
Innayon na a makaammo da a mangisursuro a mangkita ti pagsayaatan dagiti adalan da ken no adda dagiti masapol da ket kiddawen da iti gobierno ket dagus met a maipaay kadakuada.
Maipalagip a napadayawan ni Alipio idiay Australia itay kallabes kas best science teacher.
