LAOAG CITY – Inbatad ni Mr. Marvin Ganal, mangidadaulo iti Municipal Disaster Risk Reduction and Management Council iti ili ti Sarrat nga awan dagiti residente a naibakwit a naapektaran ti Super Typhoon Carina.
Segun kenkuana, uray awan dagiti naibakwit a residente ke agtultuloy ti naiget a panagmonitor ti opisinada pakairamanan kadagiti barangay officials kadagiti residente ken nagduduma a lugar iti ili ti Sarrat.
Inpakaammona nga nga awan ti nairekord a nalayus a lugar iti nadakamat nga ili no man pay nakapaspasar daytoy iti napigsa a panagtudo.
Mainaig iti daytoy, kinunana a kumpleto dagiti equipment ken rescue personnel ti Municipal Disaster Risk Reduction Management Council iti ili ti Sarrat a nakasagana a mapan agresponde.
Nupay kasta, adda dagiti dadduma nga infrastructure projects iti nadakmat nga ili ti nadadael gapu pay laeng iti napigsa nga ayus iti danum nangruna iti Padsan River.
Innayonna a dagiti flood control project a nadadael ket iti Brgy. 13, Brgy. 14, Brgy. 4 ken Brgy. 12 gapu iti napigsa nga ayus iti danum gapu iti Super Typhoon Carina.
Kabayatanna, kunana a saanda pay a masinunuo nu mano ti gatad dagiti nadadael nga infrastructure projects iti nagduduma a barangay iti ili ti Sarrat.
