LAOAG CITY – Inlawlawag ti Land Transportation Franchising and Regulatory Board nga awan ti mapasamak a panagngato iti panagsingir iti pagplete iti intero a pagilian nangruna idiay Metro Manila gapu iti agtultuloy a pannakaipatungpal iti Public Utility Vehicles modernization program.
Segun ken ni Land Transportation Franchising and Regulatory Board Chairperson Teofilo Guadiz III nga awan ti pangibasaran tapno ingato ti plete kadagiti pampasahero a lugan nangruna ket maikidkiddaw ti fare hike petition tapno solbaren ti Land Transportation Franchising and Regulatory Board.
Inbatadna a maipadalan iti naiget a panagadal ken konsultasion iti publiko ti aniaman a petision iti panagngato ti plete tapno ad-adda a maawatan ken maakseptar dagiti Public Utility Vehicle operators ken commuters.
Inaramid ti Land Transportation Franchising and Regulatory Board ti nasao a rakurak iti sayangguseng dagiti pasahero a ngumina iti plete kadagiti pampasahero a lugan gapu iti modernisasion dagiti Public Utility Vehicles, panagngato ti inflation ken produkto a petrolyo.
Inpaganetget ni Guadiz nga iti kanito nga adda ti agkiddaw ti fare hike petition ket dagusda nga adalen a naimbag para iti pagsayaatan dagiti naruay nga umili.
