LAOAG CITY – Inlawlawag ti Department of Health (DOH) a saan pay nga inaprobaran ti Food and Drug Administration (FDA) ti aniaman a bakuna iti monkeypox ditoy pagilian.
Inaramid ni Health Secretary Ted Herbosa ti panangilawlawag kalpasan a naammoan ti Department of Health a maysa nga establishimento ti mangibagbaga a nabakunaanen dagiti amin a mangmanggedda kontra iti monkeypox virus.
Inbatadna a daytoy ket nai-post iti online ken no bilang adda ti naalada a bakuna ket saan daytoy a rehistrado iti Food and Drug Administration.
Inpettengna nga aggapu man iti pribado wenno pampubliko iti pangalaan, daytoy ket nasken a nakarehistro iti Food and Drug Administration ti Pilipinas.
Inlawlawagna a no saan a rehistrado, daytoy ket maikonsiderar a kontrabado.
Plano ti Department of Health nga agkiddaw ti tulong iti Department of Justice (DOJ) ken National Bureau of Investigation (NBI) para iti posible a panangipila ti kaso kontra kadagiti establishimento a mangitantandudo iti panagusar ti kontrabando a bakuna.
Innayon pay ni Herbosa a mabalin a kumpiskaren ti Food and Drug Administration ti illegal nga monkeypox vaccine.
