LAOAG CITY – Awan ti Heat Wave ditoy pagilian iti baet ti agtultuloy a mapaspasaran a kinabara ti panawen.
Segun ken ni Dra. Ana Solis, chief Climatology Division ti Philippine Atmospheric, Geophysical and Astronomical Services Administration, ti Pilipinas ket maysa a tropical country isu nga awan ti heat wave iti pagilian no sadino ad-adda a mapasaran ti heat wave kadagiti pagilian nga adda ti disiertona.
Inbatadna nga iti sobra a kinapudot ti paniempo ket gapu iti El Niño Phenomenon a nangrugi a narikna idi simrek ti summer season isu a doble ti init a marikrikna dagiti umili.
Kunana a napudpudot ti marikrikna dagiti tattao no adda dagitoy iti urban areas gapu kadagiti agkakadakkel a pasdek a naaramid iti bato gapu ta ti bato ket ag-absorb ti solar energy manipod iti init.
Nagpalagip ni Solis kadagiti umili nga annadan ti salun-at ken saan a rumuar iti pagtaengan manipod iti alas-10 ti bigat agingga alas-4 ti malem tapno makaliklik ti epekto ti nakaro nga epekto ti nabara a panawen.
Naammoan a sakbay a sumrek ti bulan ti Mayo ket adda ti irakurak ti Philippine Atmospheric, Geophysical and Astronomical Services Administration maipanggep iti update iti mapaspasaran a kinabara ti paniempo.
Immunan nga inpakaammo ni Solis a ti nabara a panawen ket agtultuloy agingga inton sumaruno a bulan ti Mayo.
