LAOAG CITY – Kalikagum ni Acting General Manager Perry Martinez ti Ilocos Norte Electric Cooperative a maikkan ti koneksion ti kuriente dagiti 1,700 a pagtaengan nga awan pay ti kurientena sakbay nga agngudo ti termino ni Presidente Ferdinand Marcos Jr.
Inbatadna a daytoy ti regalo ti kooperatiba iti Presidente apaman a malpas ti terminona gapu ta daytoy ti kalikagumna ken nadakamatna iti naudi nga State of the Nation Address mainaig iti koneksion ti kuriente.
Nupay kasta, inlawlawagna a dagiti saggaysa a pagtaengan nga adayo ket posible a solar ti maipan kadagitoy.
Mainaig iti daytoy, adda ti pammilinna kadagiti Area Managers a mangaramidda ti inventory kadagiti nasao a pagtaengan tapno maammoan no mano a pundo ti masapul ken no kabaelan ti kooperatiba nga ibaklay.
Kunana a no saanda a kabaelan ket posible nga umasidegda kadagiti political leader tapno mapundoan daytoy.
Naammoan nga idi ag-survey-da ket nangestablisarda ti hotline nga isu ti pagtawaganda tapno mai-report no ania pay a lugar dagiti awan koneksion ti kurientena.
Innayonna a kasapulanda ti tulong dagiti member-consumer owners ken Local Chief Executive tapno maammoan no ania pay a lugar dagiti masapul a maikkan ti koneksion tapno awan ti malabtawanda.
