LAOAG CITY – Inpakaammo ni Sen. JV Ejercito nga awan pay ti nangipila ti reklamo mainaig iti saan pay a panagatendar ni Sen. Ronald “Bato” Dela Rosa iti Senado.
Daytoy ket kalpasan nga addan ti dua a bulanen ti napalabas a saan pay a nagpakpakita wenno nagatendar iti aniaman a session ti Senado ni Sen. Dela Rosa.
Inbatad ni Sen. Ejercito a nakadepende ti desision ti liderato ti Senado no palubusanda a physically present wenno saan.
Inlawlawagna a maammoanto pay laeng ti agbalin a desision iti sibubukel a Senado apaman nga agsubli ti session-da inton Enero 26 kalpasan ti holiday break.
Maipalagip a saanen a nagatendar ti aniaman a session iti Senado ni Sen. Dela Rosa sipod idi Nobiembre 11, 2025.
Immuna iti daytoy, nangrugi a nag-absent ni Sen. Dela Rosa kalpasan nga inrakurak ni Ombudsman Jesus Crispin Remulla a maipagarup a nangiyisyu ti warrant of arrest ti International Criminal Court kontra iti Senador gapu iti nadara a kampania kontra iti iligal a droga kabayatan ti administrasion Duterte.
Kabayatanna, ni Sen. Dela Rosa ket dati nga Hepe ti Philippine National Police nga isuna ti kangrunaan a nangipatungpal ti war on drugs.
