LAOAG CITY – Awan dagiti kameng ti Philippine National Police (PNP) ditoy probinsya nga adda ti pannakainaig na iti illegal a droga wenno “narco cops”.
Daytoy ti inpasigurado ni Police Major Rely Layug, pannakangiwat iti Police Community Relation Office iti Ilocos Norte Police Provincial Office (INPPO).
Inrakurak daytoy ni Layug kalpasan nga inrakurak ni Presidente Rodrigo Duterte nga adda ti nasurok a 300 a “narco-cops” ditoy pagilyan.
Inlawlawag ni Layug nga awan ti mamonmonitor da a kameng ti pulisya ditoy probinsya nga adda ti pakainaigan na iti illegal a droga.
Inpasingked na nga iti baet nga adda dagiti kakadwa da iti sabali a lugar kas iti National Headquarters a maipagarop nga adda ti pannakainaig na iti illegal a droga ket saan da a maapektaran iti panangipatungpal da iti trabaho da ditoy probinsya.
