LAOAG CITY – Awan ti pakainaigan ti Kyiv iti panagswek ti eroplano a maipagarop a nagluganan ni Wagner leader Yevgeny Prigozhin.
Daytoy ti inpetteng ni President Volodymyr Zelensky iti Ukraine.
Inpalgak ni Zelensky kadagiti kameng ti media nga ammo ti amin no siasinno ti adda iti pakainaigan ti nasao a pasamak.
Immunan a nairakurak a pimmusay amin dagiti 10 a nakalugan iti nagswek nga eroplano a pakairamanan ni Prigozhin.
Nupay kasta, agpapan maisursurat daytoy a damag ket awan pay ti kumpirmasyon no pudno a maysa ni Prighozin kadagiti pimmusay.
Basar iti report, karaman kadagiti nakalugan tii nagswek nga eroplano ket ti right-hand ni Prighozin a ni Dmitry Utkin.
Mainaig iti daytoy, iti panagbitla Russian President Vladimir Putin international summit ket saanna pulos a nadakamat ti maipapan iti maipagarop a pannakatayen ti wagner leader. Ti Wagner mercenary group ket aktibo iti Ukraine agingga nga indaulwan ni Prigozhin ti apagbiit a panagrebelde idi Hunyo ita a tawen nga inawagan ni Russian President Putin a panagtraydor iti gobierno na.
