LAOAG CITY – Awan ti mamonmonitor ti Philippine National Police (PNP) iti aniaman a seryoso a pangta iti seguridad iti panangselebrar ti paskua.
Iti baet daytoy, inbatad ni Philippine National Police Spokesperson P/Brig. Gen. Jean Fajardo nga agtaltalinaed nga adda iti heightened alert status ti Philippine National Police iti panangselebrar ti paskua ken panangsarabo ti baro a tawen nga agpaot agingga iti Traslascion ti Nangisit a Nazareno inton Enero 9, 2025.
Inbatad ni Fajardo, sipod pay idi Disiembre 15 ket addadan iti heightened alert ti nailian a pulisia kas panagsagsagana iti naatiddog a selebrasion ti paskua ken agtultuloy agingga iti fiesta ti Nangisit a Nazareno.
Dumanon iti 40 a ribu dagiti pulis ti nai-deploy iti intero a pagilian tapno agbantay kadagiti bus terminals, eropuerto ken dadduma pay.
Adda pay dagiti K9 units kadagiti pampubliko a terminal tapno tumulong iti panangiwayat ti inspeksion kadagiti bagahe dagiti pasahero.
Kabayatanna, manamnama ti pannakaipatungpal ti gun ban kadagiti pulis tapno maipasigurado nga awan ti mapasamak nga indiscriminate firing iti panangsarabo ti baro a tawen inton 2025.
Nagpalagip ni Fajardo iti publiko a liklikan nga agpaputok ti firecrackers kadagiti residential area tapno maliklikan ti peggad kas ti uram.
