LAOAG CITY – Naglikudan ni Philippine National Police Chief Gen. Jose Melencio Nartatez Jr. ti akusasion ti international rights group a maipagarup nga agtultuloy a mapaspasamak dagiti panangpapatay nga adda ti pakainaganna iti droga a pakairamramanan dagiti pulis wenno ti sibilian iti babaen ti administrasion ni Presidente Ferdinand “Bongbong” Marcos Jr.
Nadakamat a binabalaw ti Human Rights Watch (HRW) ti gobierno ti Pilipinas gapu iti daytoy.
Inbatad ni Nartatez nga iresrespetarda ti takder ti international rights group ngem saan daytoy nga umannugot iti accountability mechanisms ti Philippine National Police ket kurang.
Inlawlawagna nga ad-adda pay a pappapigsaenda dagiti internal investigations ken sigsiguradoenda a mapatawan ti pannusa dagiti pulis nga aglabsing iti linteg.
Innayonna a bigbigbigenda dagiti adbokasia maipanggep iti karebbengan dagiti tattao ken ti maipatpatungpal a linteg ngem nasken a daytoy ket maibasar iti kinapudno.
