LAOAG CITY – Patien ni Atty Ferdinand Agustin, maysa nga abogado ditoy probinsiya nga adayu nga rebokaren ti kongreso ti indeklara ni Presidente Rodrigo Duterte nga martial law idi rabii.
Kuna ni Agustin nga daytoy ket gapu ta kaadduan a kameng ti kamara ken senador ket kaalyado ken kapartidoan ti presidente.
Segun kenkuana, no adda man grupo nga agkalikagum a mangkuwestiyunar ti naideklara a martial ket mabalin a mangipila da ti petisyun iti korte.
Kabayatanna, inlawlawag pay ni Agustin nga adda man deklarasyun ti martial law wenno awan ket mabalin latta a maipatungpal ti warrantless arrest.
Kuna ti abogado a mabalin a maarestar ti maysa a tao no daytoy ket naimatangan a nakaaramid ti krimen, gandat na nga aramiden ti krimen wenno kaar-aramid na laeng ti krimen.
Adayu nga adda pannakainaig na ti maitantandudo a pannakabaliw ti sistema ti gobyerno iti pederalismo ti pannakaideklara ti martial law idiay Mindanao.
Daytoy ti inbatad ni Atty Ferdinand Agustin, maysa nga abogado ditoy probinsiya.
Patien na a ti makagapu a naideklara ti martial law idiay Mindanao ket tapno mapagtalinaed ti linak, urnos ken talna iti nasao a paset ti pagilian.
Kuna na a no ti situasyon idiay Mindanao ti mapagsasaritaan ket narigat a maipatungpal ti panagdur-as iti naao a lugar no nariribuk.
