LAOAG CITY – Lagipen ti pudno nga anag kageddan ti pannakaselebrar ti Valentine’s Day ita nga aldaw.
Daytoy ti inpakaammo ni Fr. Joey Ranjo, ti St. William Cathedral ditoy siudad ti Laoag.
Segun kenkuana, saan a liplipatan a ti pudno nga anag iti panangrambak ti aldaw dagiti puso ket ti panangipateg ti ayat ken sakripisio iti maysa a tao.
Inbatadna a nangrugi a maselebraran ti Pebrero 14 kalpasan a pimmusay ni San Valentino, maysa a Padi wenno Obispo iti nasao nga aldaw.
Kunana a ni San Valentino ti nangirugi dagiti nakadawyan nga ar-aramiden iti agdama nga henerasion kas ti panagsurat ti love letter ken panagkartib ti nagsinan puso a mangipalagip ti panangiparikna ti ayat kadagiti kapisi ti puso.
Inlawlawagna a nagbalin a patron iti panagayat ni San Valentino gapu it panagayatna iti Dios, panagserbi iti simbaan, nakaaramid ti milagro ken nakatulong kadagiti agasawa.
Innayonna nga iti panagtulid ti panawen ket nagbalbaliw ti istilo ti pannakaselebrar ti Valentine’s Day kas ti panangipaay ti nabalor a regalo iti karelasion maidasig iti simple laeng a surat ken oras idi umuna a paniempo.
