LAOAG CITY – Maysa a babai idiay Ohio, U.S.A. ti nakigtot idi naduktalanna a ti ginatangna a daan a painting iti maysa a thrift store iti balor a $2.99 wenno sumurok-kumurang P170 ket orihinal nga obra ti maysa a sikat a pintor ken nailako iti maysa nga auction ti agarup $2,875 wenno sumurok P160,000.
Ni Marissa Alcorn, maysa a residente ti Dayton ket kaduana ti fiancé-na idi nagturongda iti maysa a Goodwill store kalpasan a nag-dinner dagitoy.
Naammoan a kabayatan a magmagnada iti nasao a second hand shop, adda ti nariparna a daan a frame a baro a nairuar manipud iti storage ti maysa nga empleado.
Inbatad ni Alcorn, saan a nagustoan ti mismo a painting ken inawaganna pay a naalas daytoy ngem gapu iti nalaka a presiona ket nagdesision a gatangen daytoy.
Bayat nga ikabkabilna ti painting iti kotse, nariparna ti maysa a bassit a label a nakakabit iti baba ti frame no sadinno a naisurat ditoy ti titulo ti painting ken ti nagan ti pintor daytoy.
Apaman a nakasangpet isuna iti pagtaenganda, nag-search isuna iti internet ken nakigtot idi naammoanna a ti painting ket inaramid ti nalatak nga American impressionist a ni Johann Berthelsen.
Idi damo ket inpagarupna a peke ti artwork ngem kalpasan a nakipaset iti online group ti art appraisers, naallukoy isuna nga ipakita iti auction house iti Cincinnati.
Intugotna daytoy iti Caza Sikes, ditoy a kinumpiramaran dagiti eksperto a pudno nga obra ni Berthelsen ti iggemna.
Ti painting a napauloan ti “Chapel, St. Patrick’s Church” ket inlako ken nailako ti $2,875.
Kuna ni Alcorn nga usarenna ti kuarta para iti dandanin a panagkallaysana.
