LAOAG CITY – Natiliw iti entrapment operation ti Philppine National Police (PNP) ti maysa a babai a maipagarop nga abortionista iti Barangay 16 iti ili ti San Nicolas.
Nabigbig ti suspek a ni Marilyn Bumanglag, agtawen ti 54, taga Barangay 7 iti nasao nga ili.
Iti eksklusibo nga interview ti Bombo Radyo Laoag ken ni Bumanglag, inbaga na nga adda ti maysa a babai a napan nangala iti balay da ken inawis na daytoy a mapan da kitaen ti barkada na a kabkabilen ti asawa na ken kayat nan a panawan daytoy.
Kuna ni Bumanglag a simmurot iti babai iti baet a saanna nga am-ammo.
Inbaga na nga iti isasangpet da iti maipagarop a balay ti mapan da tulungan a barkada ti maseknan ket adda ti inyawat ti nasangpetan da a babai a kwarta nga 4 a ribo a pisos kagiddan ti isasangpeten dagiti otoridad.
Inadmitir ni Bumanglag a dagiti agas, posporo ken para makina ket bagina ngem ti kwarta ket inted ti nasangpetan da a babai.
Inkalintegan na nga adda dagiti agas na gapu ta mapan makiminatay iti Barangay Buttong ditoy ciudad ken ti lighter ket usaren na nga agsigarilyo.
Inpetteng na nga awan ti trabaho na ta supsuportaran dagiti annak na ken awan ti ammo na iti maipababasol kenkuana, kagiddan ti panangibaga na a set-up ti napasamak.
Mainaig iti daytoy, inbatad ni Police Major Joseph Baltazar, ti chief of police iti il ti San Nicolas, a nabayagen a monmonitoren da maipagarop nga illegal nga aktibidad ni Bumanglag.
Innayon na nga adon dagiti nagdamdamagan da a maipagarop nga inik-ikkat ni Bumanglag ti sikog na isut gapuna nga inpursige da ti operasyon tapno agsardengen ti illegal nga aktibidad ti suspek.
Kuna na a saan da a dagus a naisayangkatan ti operasyon ni Bumanglag gapu iti kaado ti trabaho da.
