LAOAG CITY – Naiwayat ti naiget a panangbirok dagiti otoridad iti naglibas a babai a balud manipud iti Ilocos Norte Provincial Jail.
Nabigbig ti balud a ni Susan Sacalup, agtawen ti 49, asawa ti retired police a ni Cecilio Salacup ken residente ti Brgy. 16 iti ili ti San Nicolas.
Segun ti INPJ, ala una y media ti malem idi kalman iti naduktalan dagiti guardiya a nakalibas ni Salacup.
Naamuan a sakbay ti panaglibas ti nasao a balud ket adda ti nangbisita kenkuana ngem saan a nabigbig dagiti guardiya ti nasao a pagbaludan.
Segun met ti pamilya ni Salacup nga adda idiay probinsya ti Abra, nagtext ni Susan kadakuada tapno ipakaammo na a nakalibas daytoy iti pagbaludan.
Naamuan a tallo a lawas na pay laeng a nakaibalud ti babai sipud idi natiliw gapu ti kaso na nga estafa.
