LAOAG CITY – Nabirukan ti maysa a babai idiay Canada ti napukaw a pitakana iti baybay.
Magmagna ni Marcie Callawaert a kaduana dagiti asona iti maysa a baybay idiay Tofino, British Columbia idi adda nadlawna a pamiliar iti darat.
Idi pinidutna, saanna a patien nga isu ti mapukpukaw a pitakana.
Iti maysa nga interbyu ni Callawaert, kinunana a natnag ti nasao a pitaka iti baybay kabayatan ti panagluganna iti barko idi Hunio 2023.
Estoria ni Callawaert, awan ti pier iti asideg ti pagnanaedanda isu a masapul nga aglugan iti bangka tapno mapan iti barko.
Kabayatan ti kaaddana iti bangka ken naglugan iti barko, naregregna ti pitakana manipud iti bulsa ti backpack-na.
Naladawen idi maammirisna ti amin nga adda iti danum ti pitakana. Adda pay ketdi panagbirok dagiti diver tapno birokenda ngem saan a pulos a narekobre.
Saanna a ninamnama a makitana pay isu a nasdaaw a nakakita iti baybay a masansan a pagpagnaanna kadagiti asona.
Amin a linaon ti pitakana kas iti kuarta, card ken ID ket kompleto ken saan a nadadael no sadinno ti laeng nadadael ket ti zipper ti pitaka.
