LAOAG CITY – Maysa a baboyramo ti nangitunda ti riribok iti Hopo Station idiay Yangsan, South Gyeongsang Province idi Oktubre 31 no sadinno a temporario nga insardengda ti operasion ti tren gapu ta adda ti nasugatan a pasahero.
Basar iti report, immuna a nakita ti baboyramo agarup 4:45 ti malem nga asideg iti restaurant iti Dong-myeon, Yangsan sakbay daytoy a bimmallasiw iti kalsada ken nakaserrek iti Hopo Station agarup 5:10 ti malem.
Ti baboyramo a mapattapatta a 100 a kilo ti kadagsenna ket nagwala ken nakabuong ti maysa a glass barrier. Kalpasanna ket kinagatna ti maysa a lalaki a pasahero iti abagana.
Dagus nga inyakar dagiti opisial dagiti dadduma pay a pasahero ken inpatungpalda ti lockdown iti station.
Simmangpet dagiti pulis ken bumbero agarup 5:43 ti malem. Gapu ta saan a nagsardeng ti panagwala ti baboyramo, awan ti naaramidan dagiti pulis no di ket paltogan daytoy.
Im-imbestigaren dagiti otoridad no kasano a nakastrek ti baboyramo iti train station.
Iti agdama, natalgeden ti pasahero a nakagat ti baboyramo.
