LAOAG CITY – Nagballaag ni P/Capt. Elison Pasamonte, Hepe ti Badoc Municipal Police Station kadagiti residente iti nasao nga ili mainaig iti panaglako iti paputok.
Inbatadna a naiget a nakamonitor ti Badoc Municipal Police Station iti merkado publiko pakairamanan kadagiti nagduduma a pasdek negosio iti nasao nga ili.
Kunana nga adda ti naka-deploy a kameng ti Philippine National Police iti aglawlaw iti ili ti Badoc a mangkita iti seguridad dagiti umili nangruna kadagiti mapan gumatang kadagiti paputok iti naikeddeng a lugar a paglakoan.
Inlawlawagna a saan a maliklikan a mangrugi ita nga aldaw ti paskua ket adda dagiti sumagmamano nga agpaputok kadagiti nagduduma a klase ti fireworks.
Innayonna a malasid iti boga, ti kangrunaan pay a monmonitorenda ket dagiti agusar ti pipe wenno dagiti nariringgor a tambutso gapu ta maysa daytoy kadagiti maipawil ken dagusda a kumpiskaren.
