LAOAG CITY – Inrakurak ni Speaker Ferdinand Martin Romualdez a ti House of Representatives ken Department of Agriculture ket seryoso ken agtultuloy ti panangikagumaanda tapno maipababa iti P30 iti kada kilo ti bagas kadagiti sumagmamano a paset ditoy pagilian mangrugi inton Hulio.
Daytoy ket kalpasan ti maysa nga oras a panagtataripnong iti opisinana ken ni Department of Agriculture Secretary Francisco Tiu Laurel, dagiti opisial ti National Irrigation Administration ken dadduma pay nga ahensia a konektado iti Department of Agriculture.
Naiyuswat ti taripnong kalpasan a nagatendar dagiti nasao nga opisial iti congressional hearing para iti plano nga amendaran ti Rice Rice Tariffication Law.
Inbatad ni Romualdez a ti presio ti bagas a nababbaba iti P30 iti kada kilo ket napagsasaritaan iti nasao a taripnong kalpasan a nakitaan ti parikot iti pannakaipatungpal ti Rice Tarrification law.
Mainaig iti daytoy, kuna ni Sec. Tiu Laurel a nupay man adda dagiti maipawil iti nasao a linteg nga aglako ti nalaka a bagas ti National Food Authority iti publiko, mabalin met a maaramid daytoy iti babaen kadagiti KADIWA centers iti pagilian.
Inpaganetget met ni Romualdez a gutiguten ti liderato ti Kongreso dagiti City ken Municipal Mayors iti pagilian a mangkita iti mabalin a pakaipatakderan dagiti KADIWA centers iti maseknanda a lugar tapno maipatungpal ti plano nga aramiden a nationwide ti nalaka a bagas.
