LAOAG CITY – Inpasigurado ni Bagong Henerasyon Party-list Rep. Bernadette Herrera kadagiti “solo parent” nga ilungalong na ti maysa a gakat tapno maipaayan ti gobierno ti atensyon ken adda dagiti maipaay a programa para kadagitoy.
Segun ken ni Herrera, maysa met daytoy a solo parent ken ado pay dagiti kasapulan nga ipaay ti gobierno tapno matulungan dagiti solo breadwinner, legal guardian, ken caregiver.
Dinakamat ni Herrera ti maysa kadagiti gagem ti Bagong Henerasyong Partylist nga “I-angat ang Lahat ng Pamilya” a mangisim-simbolo iti naig-iget a panangbigbig kadagiti kasapulan dagiti “soloista” ken ti pamilya da.
Segun iti kongresista, basar iti maysa a panagadal ket adda ti sumurk-kumurang a 15 a muilyon a nairekord a solo parents iti pagilian ken 95% kadagitoy ket babbai.
Innayon ni Herrera a naipagagangay kadagiti soloista ket marigatan a makaala ti benepisyo a nakailanad iti Solo Parent Act, karaman ditoy ti panagala a mismo ti Solo Parent Identification Card.
Kuna na pay nga adda dagiti establisyemento a saan nga agaw-awat ken mangipapaay ti maiyannatop a diskwento wenno benepisyo kadagiti Solo Parent Identification holders.
Gapu iti daytoy, ipila ni Herrera ti House Resolution No. 1681 a mangpaiget iti Expanded Solo Parents Welfare Act wenno Republic Act No. 11861.
Inkalintegan ni Herrera a kasapulan a mapalawa ken maipaayan ti naan-anay nga atensyon ti nasao a linteg tapno masigurado nga umdas ti pondo ken implementasyon.
