LAOAG CITY – Umabot iti 320 a simmangpet ken retirado nga Overseas Filipino Workers ti nabenepisyaran iti pannakaiwayat ti “Bagong Simula” Financial Management and Entrepreneurship Seminar ditoy ciudad ti Laoag.
Daytoy ti inpakaammo ni Ms. Shey Pia Abaya, ti mangidadaulo iti Public Employment Service Office ditoy ciudad.
Kuna na a daytoy ti kaunaan a gundaway a naiwayat ti nasao a seminar, ken dakkel daytoy a tulong kadagiti Overseas Filipino Workers aglalo iti panangimanihir ti kwarta a naiyawid da manipod iti panagtrabaho da iti ballasiw taaw.
Inbatad pay ni Abaya a saan amin nga Overseas Filipino Workers ket napintas ti financial stability da.
Innayon na a ti kangrunaan a naisuro kadagiti Overseas Filipino Workers ket ti panagpuunan, panangimanhir ken no kasanu ti agurnung ti kwarta.
Kabayatanna, inpakaammo ni Abaya nga adda dagiti sumagmamano a partisipantes a nangnamnama a maipaayan da ti tulong pinansyal, ngem inlawlawag na a saan nga ar-aramiden daytoy ti idaulwan na nga opisina ngem mabalin da nga asistiran dagiti maseknan nga umasideg iti nagduduma nga ahensya kas iti Overseas Workers Welfare Administration (OWWA) ken dadduma pay.
