LAOAG CITY – Kimmapsot ti Bagyo Emong kabayatan a dumaldalyasat iti Cordillera Administrative Region.
Nupay kasta, inlawlawag ni Engr. Cynthia Iglesia, ti Department of Science and Technology – Philippine Atmospheric, Geophysical and Astronomical Services Administration iti Laoag International Airport nga agtultuloy a makapasar ti panagtudtudona agingga inton Domingo.
Segun kenkuana, ad-adda a napigsa ti tudo kabayatan a makapaspasar ti angin abagat ditoy pagilian.
Inbatadna a no ti bagyo ket adda iti amianan kangrunaanna iti Calayan Island ket ad-adda a makapasar ti panagtudtudo ditoy probinsia.
Inlawlawagna a limmabes metten ti kasapulan a danum dagiti kataltalonan dagiti mannalon gapu kadagiti agsasaruno nga iduduprak dagiti bagyo.
Innayonna a manamnama nga adda pay dagiti mabukel a bagyo iti Philippine Area of Responsibility kadagiti sumarsaruno a lawas wenno bulan.
