LAOAG CITY – Naisalbar ti biag ti maysa a baket nga agtawen ti 57 a ginandatna nga agpakamatay iti ili ti Sarrat.
Segun ken ni P/Capt. Ashley Cacayorin, Hepe ti Sarrat Municipal Police Station, nakigtot ti asawa ti baket idi nakitana daytoy a nakabitinen a nakagalut ti tengngedna ti tali iti pagtaenganda.
Inbatadna nga insigida a nagpaarayat ti asawa ti baket kadagiti kabbalayna ket ditoy a naobserbaranda nga adda pay ti pulso daytoy.
Inlawlawagna nga insigida a timmawag ti maseknan a pamilia iti kapulisan rason a napaspas a nakapagrespondeda iti lugar.
Kunana a babaen iti police mobile car-da ket insigida a naitaray iti kaasitgan nga ospital iti ili ti Dingras ti biktima no sadinno a naisalbar ti biagna.
Mainaig iti daytoy, inpakaammo ni P/Capt. Cacayorin a basar iti imbestigasionda ket napan nagpa-check up iti ospital ti biktima ngem rumrummuar a saanna a naawat ti nagbalin a resulta daytoy agingga a na-depressed a nangitunda ti pananggandatna nga agpakamatay.
Iti agdama, adda iti Intensive Care Unit ti Mariano Marcos Memorial Hospital and Medical Center iti siudad ti Batac ti nasao a biktima para iti naan-anay a pannakatamingna.
