LAOAG CITY – Nablo ti akin-kannawan nga abaga ti maysa a baket kalpasan a nadungpar ti maysa a tricycle iti paset ti Barangay 57, Pila ditoy ciudad ti Laoag.
Nabigbig ti biktima a ni Teofila Bernardo Felipe, agtawen ti 67 ken residente met laeng iti nadakamat a barangay.
Iti imbestigasyon ti PNP-Traffic Division ditoy ciudad, nakatakder iti igid ti kalsada ti baket ken agur-uray ti pagluganan na idi kellaat a nadungpar ti tricycle nga inturong ni Ernesto Ragaza, agtawen ti 47, naasawaan ken residente iti Barangay Caoacan ditoy ciudad.
Naamoan a nabartek ni Ragaza ken aggapo daytoy iti maysa a paggiinuman iti Barangay 1 ditoy ciudad.
Segun ken ni Police Corporal Alex Asuncion iti PNP-Traffic Division ditoy ciudad, nasemento ti akin-kannawan nga abaga ti biktima.
Innayon na nga agsasarita pay laeng dagiti maseknan intono bigat mainaig iti nasao a pasamak.
