LAOAG CITY – Inrakurak ti World Health Organization nga awan ti pakainaganna ti bakuna iti autism maisupadi kadagiti biddot a teorya nga agwarwaras idiay Estados Unidos.
Inbatad ni World Health Organization Chief Tedros Adhanom Ghebreyesus iti Geneva a basar iti 31 a panagadal iti uneg ti 15 a tawen, karaman dagiti bakuna nga addaan ti thiomersal ken aluminium adjuvants, awan ti ebidensia ti rason ti autism manipud iti bakuna.
Daytoyen ti maikapat a pannakatingiting ti ebidensia, kagiddan dagiti review idi 2002, 2004 ken 2012 nga amin ket nagresulta a ti bakuna ket saan a makaitunda ti autism.
Naammoan a ti biddot a koordinasion iti nagbaetan ti MMR vaccine ken autism ket naggapu iti flawed a panagadal idi 1998 a saan a nagbayag ket inikkat gapu iti peke a datos ngem agtultuloy latta ti saan nga husto a pammati iti publiko.
Dinakamat ni Tedros a ti bakuna ket nakatulong iti panangkissay ti under-five mortality manipud iti 11 a milyon idi 25 a tawenen ti napalabas agingga iti 4.8 a milyon iti agdama.
Innayonna a ti bakuna ket maysa kadagiti kabibilegan a pinartuat ti pakasaritaan iti sangalubongan gapu ta makaisalbar daytoy iti biag manipud kadagiti 30 a nagduduma a klase ti sakit pakairamanan ti measles, cervical cancer ken malaria.
