LAOAG CITY – Nagbalin nga emosyonal ni Miss Morning Marry Cortez, agtrabtrabaho iti Discolandia iti ili ti San Nicolas ken ditoy ciudad ti Laoag bayat ti panangistorya na iti napasamak iti kaanakan na a biktima ti hit-and-run iti paset ti Barangay 16 iti nasao nga ili.
Segun ken ni Marry Cortez, pasado alas-onse ti rabii idi Oktubre 29 ita a tawen idi bimmallasiw iti kalsada ti kaanakan na a binigbig na a ni Sabrina Cortez, agtawen ti 18, taga Metro Manila ngem pada na nga agtrabtrabaho iti bar iti ili ti San Nicolas.
Kinumpirmaran ni Marry a nakainom ti arak ti kaanakan na idi napasamak ti insidente.
Mainaig iti daytoy, kuna ni Marry nga idi dandanin makadanun iti igid ti kalsada ti biktima tapno mapan koma makiusar ti Comfort Room iti maysa a tianggi ket adda ti kotse a napardas ti tarayna a nakadungpar iti kaanakan na, ngem saan da a nalasin ti plate number ti lugan gapu ta nasipnget iti lugar.
Kuna na pay a nakita da nga apagapaman a nagsardeng ti nasao a lugan ngem kalpasan a nakita ti driver ti nakadasayen a kaanakan na ket nagpataray a dagus ti maseknan.
Inpalgak ni Marry a saanna a dagus nga inpost ti napasamak iti kaanakan na gapu ta maipagarop a pinawilan dagiti kameng ti pulisya tapno saan nga ad-adda nga umadayo ken aglemmeng ti driver ti kotse.
Nupay kasta, inpetteng ni Marry a bayat ti pannakataming ti kaanakan na iti Mariano Marcos Memorial Hospital and Medical Center iti ciudad ti Batac ket pimmusay metlaeng gapu ti kaado dagiti sinagaba na a sugat iti nagduduma a paset ti bagina kangrunaan na iti ulo na.
Gapu iti daytoy, saanen a nagpangadua ni Marry a nangipost ti nakaladladingit a pasamak iti kaanakan na.
Iti agdama, hustisya ti iyik-ikkis ti pamilya ken kakabagyan ti biktima ken nagpanawagan da iti driver ti kotse nga agpakita koman ken sungbatan na ti inaramid na a krimen.
Naamoan a ti nasao a biktima ti breadwinner iti pamilya da no sadinno nga adda ti uppat a kakabsat na a pagad-adalen na.
Kabayatanna, inbatad ni Police Capt. Randy Damo, ti chief of police iti ili ti San Nicolas nga agtultuloy ti naiget nga imbestigasyon da tapno maamoan no siasinno ti nagmaneho iti vios a kotse a maipagarop a nakadungpar ken ni Sabrina Cortez a poon metten ti nakatayan ti biktima.
Inlawlawag ni Damo a ti tututukan da iti agdama ket ti panangrebisar kadagiti nakamuntar a Closed-circuit television (CCTV) ken mangnamnama da a babaen kadagitoy ket alisto da laengen a matuntun ti kinasiasinno ti suspek.
Innayon na a ti manamnama nga ipila da kontra iti suspek ket kaso a reckless imprudence resulting in homicide.
Iti agdama, nagtalinaed paylaeng ti bangkay ti biktima iti Mariano Marcos Memorial Hospital and Medical Center kabayatan a maipros-proseso dagiti kasapulan a dokumento para iti pannakaiyawid na iti Metro Manila.
