LAOAG CITY – Nagtalinaed iti kustudiyar ti PNP-San Nicolas ti balasang kalpasan ti pannakatiliw na gapo iti maipagarop a panagtakaw na iti dakkel a Mall iti nasao nga ili.
Nabigbig daytoy a ni Kyle Ballesteros y Quindipan, agtawen ti 18, balasang ken residente iti Barangay Balili, La Trinidad, Benguet.
Basar ti imbestigasyon ti PNP-San Nicolas, adda ti nasiputan ti CCTV operator iti Mall nga adda ti uppat a babbai ti maipagarop a nagala ti assorted cosmetic products.
Kalpasan daytoy ket nakita manen ti CCTV operator ni Ballesteros nga adda ti idurduron na a push cart nga addaan ti sling bag a naglaon ti cosmetic products a nabungon ti tissue.
Naamoan nga idi adda iti exit ti Mall ni Ballesteros ket sinitar dagiti security guards ken ditoy a positibo a naala manipud kenkuana dagiti nasao a produkto iti bag na nga agbalor ti P6,479.50 ken awan ti naipresentar na a resibo.
Gapo iti daytoy, naikustudyar iti istasyon ti puslisya iti nasao nga ili ni Ballesteros.
Kabayatanna, inlawlawag ni Police Staff Sergeant Jhan Lay Apostol, imbestigador ti PNP-San Nicolas a basar kenni Ballesteros ket adda pay ti tallo a kakadwa wenno kakunsabo na ngem saan nan a binigbig dagitoy.
