LAOAG CITY – Inbatad ni Barangay Chairman Remigio Castro iti Barangay Utol, Bangui, Ilocos Norte iti pannakaisayangkat ti search warrant operation iti balay ti maysa a kabarangayan na.
Nabigbig ti subject ti operasyon a ni Levyjay Lorenzo y Currimao, 35, construction worker, ken residente met laeng iti nadakamat a barangay.
Segun ken ni Castro, dati a drug surrenderee ni Lorenzo ngem nakita na a pursigido daytoy nga agbalbaliw.
Kuna na a kas pammaneknek ket nakiparpartisipar ni Lorenzo kadagiti programa a para kadagiti drug surrenderee.
Innayon pay ti kapitan a kanayun a makumikum ni Lorenzo iti trabaho na kas karpintero ken saan payen nga agin-inom daytoy ti nasanger.
Kabayatanna, inbatad ni Police Capt. Julius Batalio, ti chief of police iti ili ti Bangui nga insayangkatan da ti operasyon ni Lorenzo kalpasan nga adda ti impormasyon da a nagsubli iti illegal nga aktibidad na.
Kuna na a nakumpiskar da ti nangisit a pouch bag iti uneg ti balay ni Lorenzo a naglaon ti innem a sachet a naglaon ti maipagarop a shabu, dua a foil, ligther ken pospuro nga adda karga na a lima a sachet nga addaan ti residue ti shabu.
Naiget met a naglikudan ni Lorenzo ti alegasyon kenkuana ken inpetteng na a saanna a kukua dagiti naala nga ebidensya iti balayda ken ipaima na lattan iti Diyos ti pannakatiliw na.
Iti agdama, addan iti kustodyar ti PNP iti ili ti Pasuquin ni Lorenzo.
