LAOAG CITY – Naminpinsan a dimmapo ti pagtaengan ni Jovanie Bautista, agtawen ti 32,maysa a mannalon iti Barangay Francisco iti ili ti Dingras.
Daytoy ti kinumpirmaran ni Senior Fire Office III Mario Colomong, fire marshall ti Bureau of Fire Protection (BFP) iti nasao nga ili.
Iti inisyal nga imbestigasyon ti BFP-Dingras, itay bigat ket nagluto ni Bautista iti dalikan da sakbay a napan iti taltalon ken awan ti nabati a tao iti balay da.
Inbatad na nga alisto a nagramram ti apoy gapo ta naaramid ti pagtaengan ni Bautista babaen kadagiti light materials ken naangin iti lugar.
Kunana a basar ti palawag ti nakakita a karruba ni Bautista ket nangrugi ti uram iti ayan ti dalikan.
Nupay kasta, kuna ni Colomong nga imbestigaren da a nalaing ti napasamak nga uram ken kitaen da no adda ti sabali a mabalin a namunganayan ti uram.
Agpapan maisursurat ti damag ket saan pay a nadeterminar ti BFP iti nasao nga ili no mano ti balor dagiti sanikua ni Bautista ti nadadael.
