LAOAG CITY – Inbatad ni Senior Fire Officer III Bonjo Aguinaldo, ti fire marshal iti BFP-Dingras nga urayen da ti statement dagiti agtagikua iti pasdek negosyo a nauram iti Barangay Albano iti ili ti Dingras.
Segun kenni Aguinaldo, saan da pay laeng a maimbitaran dagiti sumagmamano nga agtagikua iti pasdek gapo ta rumrumuar ket positibo dagitoy iti covid-19.
Inlawlawag na nga iti agdama ket saan da pay a maibaga ti balor dagiti kagamitan a nauram gapo ta naka-quarantine dagiti agtagikua nga isu ti makaammo ti balor dagiti lako da.
Malaksid iti daytoy, kunana nga alaan da pay ti statement ti maysa nga empleado ti panaderya nga isu ti ummuna a nakakita ken nangsebseb iti apoy a mapapati a nangrugi iti likod ti pasdek.
Mainaig iti daytoy, kuna ni Aguinaldo nga addaan da ti 45 nga aldaw tapno mailippas ti imbstigasyon iti napasamak.
Kabayatanna, inlawlawag ni Aguinaldo nga idi naitawag iti caretaker ti napasamak ket 5:50 iti malem ken 6:05 laeng a naireport iti BFP.
Inpalgak na nga iti sumagmamano a minutos a napalabas ket dakkelen ti apoy ken nagramram daytoy nangruna ket naaramid babaen iti light materials.
Immapela iti publiko a no adda ti kastoy nga insidente ket dagus kuma a maireport iti BFP tapno maliklikan ti nakarkaro a pasamak.
