LAOAG CITY – Mairekreklamo ti Presidente ti MAARO zanjera iti Barangay San Esteban iti ili ti Dingras gapu iti maipagarup a saanna a panangipakaammo kadagiti miembrona ti mapaspastrek ti reaper nga inpaay ti gobierno kadakuada.
Inadmitir ni Mr. Bernardo Castillo, Presidente ti nasao a zanjera a saanna nga in-report daytoy iti probinsia.
Nupay kasta, inlawlawagna nga adda ti papel wenno dokumento nga inpasana ngem awan ti kuarta a nai-report.
Kunana nga adda ti napastrekda a 120 a ribu a pisos idi 2023 ken 90 a ribu a pisos idi 2024 idinto a saanna pay a nalpas ti report idi 2025.
Inbatadna a ti ipakpakaammona kadagiti miembrona ket no mano ti mapaspastrekda no sadinno a ti 19 a porsiento ti maikabil iti zanjera nga isu ti gastosenda.
Mainaig iti daytoy, inpetteng ni Castillo nga awan ti kinapudnona ti maiyak-akusar kenkuana a maipagarup nga adda dagiti inbulsana a napastrek iti zanjera-da.
Inpanamnamana a mabalin a sublaten wenno buluden dagiti miembrona ti reaper.
Innayonna a tunggal umuna nga aldaw ti Sabado iti kada bulan a maisaysayangkat ti taripnongda.
Naammoan a naipaay kadakuada ti reaper idi Mayo 17, 2023.
