LAOAG CITY – Umabot iti sumurok-kumurang 50 ribu a pisos ti balor iti pannakadadael ti maysa a pagtaengan iti Barangay Balaoi iti ili ti Pagudpud kalpasan a nauram.
Segun ken ni Fire Officer 1 Resty Saguilia, ti Bureau of Fire Protection iti ili ti Pagudpud, nabigbig ti akinkukua ti nauram a pagtaengan a ni Jackson Valdez Francia, agtawen ti 39, addaan ti live-in partner, mangngalap ken residente ti Barangay Balaoi iti nasao nga ili.
Inbatadna a basar iti inwayatda nga imbestigasion, apaman a nakasangpetda iti lugar ket nakitada nga agtitinnulong dagiti karruba iti panangsebseb ti apoy.
Inlawlawagna nga alisto a nagramram ti apoy gapu ta naaramid laeng iti light materials ti pagtaengan.
Innayonna nga agtultuloy ti imbestigasionda maipanggep iti namunganayan ti uram.
