LAOAG CITY – Nangiparuk-at ni Senador Bam Aquino ti progress report mainaig ti 10 a bulanna kas chairperson ti Senate Committee on Basic Education, no sadinno nga inpannakkelna dagiti programa ken reporma a paka-benepisiaran dagiti agad-adal ken mannursuro ken mangtulong a solbaren ti krisis iti edukasion iti pagilian.
Naikkat ni Aquino kas chairperson ti komite kalpasan a nagbaliw iti liderato ti Senado a nangiyakar kenkuana iti minorya.
Iti sidong ti liderato-na, naimplementar ti 10 a tawen a National Education and Workforce Development Plan (NatPlan) 2026–2035 tapno makatulong iti problema a sangsanguen ti educational system iti pagilian.
Karaman ditoyen ti learning gaps ken agtultuloy a panagbababa ti  proficiency a naipakita ti Comprehensive Rapid Literacy Assessment (CRLA).
Impasigurdo pay ni Aquino ti P1.34-trilyong pondo para iti edukasion iti babaen ti 2026 national budget.
Karaman iti P67.9 bilyon para iti panangipatakder ti 25,000 a classrooms tapno makatulong a masolbar ti agkurkurang a 166,000 classrooms iti pagilian, kasta payen ti P37 bilyon para ti pannakaimplementar ti Free College Law (RA 10931), karaman ti nayon a pundo para iti Tertiary Education Subsidy (TES), a mangted ti allowance kadagiti nakurapay nga estudiante.