LAOAG CITY – Inrakurak ti militar ti Israel a nabigbigda ti maysa a bangkay manipud idiay Gaza a maysa nga Israeli-Argentinian a ni Lior Rudaeff.
Ti agtawen ti 61 ket pinatay kabayatan ti pananggandatna nga isalakan ni Nir Yitzhak kibbutz iti panawen ti panangatake ti Hamas iti southern Israel idi Oktubre 7, 2023 ken ti bangkay ket naikabil iti Gaza ti Palestinian Islamic Jihad (PIJ) armed group.
Inbatad ti Palestinian Islamic Jihad a nasarakan ti bangkay idi Biernes iti Khan Younis iti abagatan ti Gaza.
Insubli itan ti Hamas dagiti amin a 20 a sibibiag nga hostage ken 23 kadagiti 28 a natay nga hostage iti babaen ti umuna a tukad ti katulagan iti ceasefire a nangrugi idi Oktubre 10 no sadinno uppat kadagiti lima a natay nga hostage nga adda iti Gaza ket dagiti Israeli ken maysa ket Thai.
Binabalaw ti Israel ti Hamas gapu ta saanna pay a naisubli dagiti amin a bangkay.
Naammoan a ti Palestinian Islamic Jihad ket maysa nga armado a grupo a kaalyado ti Hamas.
Kabayatanna, nakipaset daytoy iti panangraut idi Oktubre 7 ken datin nga iggemna dagiti sumagmamano nga hostage ti Israel.
