LAOAG CITY – Naidulinen ti bangkay ni Prince Philip babaen iti ceremonial royal funeral iti St George’s Chapel idiay Windsor Castle.
Iti coverage ti Bombo Radyo Philippines babaen kada Bombo Elmar Acol iti Makati News Center kenni Bombo International News Correspondent Ramil Isogon iti Windsor, United Kingdom, natutukan a naimbag iti napasamak iti panagtabon ti prinsipe agingga a naidulin daytoy iti chapel.
Kadagiti napasamak, binigbig ti Dean of Windsor ti kinasayaat, panagbalin na a managpakatawa ken iti kinamakatao na kabayatan ti seremonya.
Nakasuot ti mask ken nasurot ti social distance dagiti nakipaset iti seremonya ti prinsipe, idinto a nagmaymaysa a nakatugaw ni Queen Elizabeth II.
Sinaruno dagiti annak ni Prince Philip ti lungan na iti funeral procession.
Umabot iti 730 a miembro ti armed forces iti panagtabon ti prisinpe ngem nalimitaran iti 30 dagiti nakipagladingit iti uneg ti St George’s Chapel, gapu ti maipatpatungpal a pagalagadan iti baet ti COVID-19 pandemic.
Kuna ni Bombo Ramil a nailugan ti lungon a nakaipanan ti bangkay ti prinsipe iti modified Land Rover no sadino ti duke ti nangdisenyo daytoy.
Indauloan ti Band of the Grenadier Guards, ti Major General’s party, ken military service chiefs ti funeral processions.
Iti lugan ti prinsipe, sinaruno ni Princess Anne ken Prince Charles, sumaruno da Prince Edward ken Prince Andrew, idinto da Prince William ken Prince Harry ket nagna da iti abay ti kasinsin da a ni Peter Phillips.
Karaman pay a simmaruno iti lugan ti prinsipe ket da Vice Admiral Sir Timothy Laurence ken Earl of Snowdon agraman dagiti duke’s household staff.
Inbatad ni Bombo Ramil a naguray met ni Queen Elizabeth iti chapel agingga a naiserrek ti lungon ni Prince Philip.
Naamuan babaen kenni Bombo Ramil a temporaryo a naidulin pay laeng ti bangkay ni Prince Philip iti maysa a vault ti chapel ken maiyuray iti ipupusay ni Queen Elizabteh II tapno aggeddan a maidulin dagitoy iti frogmopre cottage kas basar iti nakadawyan ti Royal Family.
Kabayatanna, innayon na a saan a nakaasideg dagiti residente ngem adda da iti ruwar iti kastilyo no sadinno a saan da a nakita dagiti pasamak iti uneg.
Immuna iti daytoy, inrakurak ni Mrs. Mrs. Sheryl Rapiz-Hadfield, iti United Kingdom nga iti telebisyon laeng iti mabalin a pagbuyaan da kadagiti pasamak iti funeral ni Prince Philip rason a saan da a rimwar wenno nagturong iti kastilyo.
Kuna na a nakikaysa met ti tiempo iti Windsor no sadinno nga awan ti nagbalin a dakes a panawen kabayatan ti seremonya.
Inbatad ni Hadfield a naladingit amin dagiti briton ken arig a naulimek iti aglawlaw.
Iti sabali a bangir, inbatad met ni Mr. Angelito Calucag iti United Kingdom, tubo iti ili ti Solsona, a sakbay iti panagtabon ni Prince Philip ket adda pay laeng dagiti sumagmamano a tattao a mapan mangipan iti sabsabong iti lungon ti prinsipe.
Nupay kasta, kuna na nga adu dagiti mangay-ayat iti prinsipe gapu kadagiti nakita na a nangipaay met iti sabsabong.
Linagip met ni Mr. Calucag iti kinasayaat ti prinsipe gapu ta alisto a maas-asetgan ken simple laeng daytoy.
Nupay kasta, sumagmamano a daras laeng makita da ti prinsipe agraman dagiti miembro ti royal family.
Kamaudian na, inbatad ni Mrs. Betsy Mata iti Untied Kingdom a sakbay iti procession ket binantayanen dagiti soldado ken naiparit iti panangipaay ti sabsabong kenni Prince Philip nangruna kadagiti saan a residente iti Windsor.
Innayon na a ti naiyuswat a programa ket Ceremonial Royal Funeral no sadino nga inkiddaw mismo ti prinsipe daytoy sakbay a pimmusay.
Kuna ni Mrs. Mata a babaen iti naisurat a kiddaw ti prinsipe ket saan na a kayat nga adda dagiti panagtitipon gapu iti pangta ti COVID-19.
Inbatad na a maipatangatang laengen it radyo ken telebisyon ti seremonya.
Innayon ni Mrs. Mata a saan a kayat ti prinsipe iti nagarbo a seremonya.
